नेपाल आदिवासी जनजाति महासंघ
संघीय परिषद् सचिवालय
प्रेस विज्ञप्ति
मितिः २०६९ असार ३ गते
नेपाल कम्युनिष्ट पार्टी एमालेले नेपाल आदिवासी जनजाति महासंघका महासचिव आङकाजी शेर्पा किसानलाई पार्टीबाट निष्काशन गर्ने लज्जास्पद निर्णय गरेको छ । एकीकृत नेकपा माओवादीले आयोजना गरेको सभामा वक्ता बनेको भन्दै उहाँलाई एमालेले पार्टीबाट निष्काशित गरेको छ । यसमा नेपाल आदिवासी जनजाति महासंघ यो स्पष्ट पार्न चाहन्छ कि महासंघमा दलीय आधारमा प्रतिनिधित्वको व्यवस्था छैन । यो पनि स्पष्ट पार्न चाहन्छ कि महासंघ न एमालेको भ्रातृ संगठन हो न अन्य कुनै राजनीतिक दलको ।
यस सम्बन्धमा महत्वपूर्ण र ध्यानयोग्य कुरा यो छ कि आङकाजी शेर्पाले नेपाल आदिवासी जनजाति महासंघको महासचिवको हैसियतले माओवादीको सभामा आफ्नो ब्यक्तिगत विचार राख्नुभएको हो । महासंघका पदाधिकारीहरुले माओवादीको मात्र होइन अन्य विभिन्न राजनीतिक दलका कार्यक्रममा उपस्थित भएर विचार राख्ने गरेका छौं । महासंघ अधिकारमुखी साझा संस्था भएकाले जुनसुकै राजनीतिक दलको कार्यक्रममा गएर यसका पदाधिकारीहरु विचार राख्न स्वतन्त्र छन् । महासंघको महासचिवको हैसियतले माओवादीको सभामा वक्ता बनेकै आधारमा आङकाजी शेर्पालाई एमालेले आफ्नो पार्टीबाट निष्काशित गर्नु हास्यास्पद त हो नै यो भन्दा पनि सो पार्टीभित्र मौलाएको अधिनायकवाद प्रकट भएको छ । यसबाट एमालेले प्रकारान्तरले महासंघमाथि हस्तक्षेप गर्न खोजेको छ जसको हामी घोर भत्स्रना गर्दछौं । नेकपा एमाले कति संघीयता विरोधी छ भन्ने यसबाट थप पुष्टि भएको छ ।
अबका दिनमा मुलुकका ठूला भनिएका राजनीतिक दलहरुभित्रका संघीयता विरोधीहरुले संघीयताको पक्षमा रहेकाहरु तथा आदिवासी जनजातिलाई पाखा लगाउने अभियान चलाइने यस घटनाबाट देखिएको छ । यो परिस्थितिमा संघीयता पक्षधर तथा नागरिक अधिकारका पक्षधरहरुले संविधानसभा विघटन गर्ने षडयन्त्रमा मुख्य रुपमा जिम्मेवार चार राजनीतिक शक्तिमा बसिरहनुको कुनै औचित्य देखिँदैन । यो परिस्थितिमा संघीयता र नागरिक अधिकारको पक्षमा रहेकाहरुले संविधानसभा विघटन गर्न जिम्मेवार चार राजनीतिक शक्तिको सदस्यता त्यागेर सम्पूर्ण नेपालीलाई समेट्ने नयाँ राजनीतिक शक्ति निर्माण गर्नुको विकल्प रहेको देखिँदैन । तसर्थ संघीयता र नागरिक अधिकारका पक्षधरहरुलाई चार राजनीतिक शक्ति त्यागेर नयाँ राजनीतिक शक्ति निर्माणको बाटोमा अग्रसर हुन हार्दिक अपिल गर्दछौं ।
राजकुमार लेखी
अध्यक्ष
नेपाल आदिवासी जनजाति महासंघ
संघीय परिषद् सचिवालय